"Кабул итү вакыты тәмамланса да, "Татар моңы"на заявкалар килүе дәвам итә"

("Татар-информ" мәгълүмат агентлыгы, 2нче март)
 
“Татар моңы - 2010” халыкара татар җыры фестивале дәвам итә. Хәзерге вакытта үз талантларын сынап карага теләүчеләрнең язмалары ТР Мәдәният министрлыгында карала.
 
Фестивальгә язмаларны кабул итү вакыты инде тәмамлануга карамастан, катнашырга теләк белдергән заявкалар килүен дәвам итә, дип хәбәр итә “Татарстан - Яңа Гасыр”ның җәмагатьчелек белән элемтәләр хезмәте.
 
Узган елгы фестивальдән аермалы буларак, быелгысында гаилә ансамбльләре өчен номинация булдырылган. Башка милләт вәкилләренең фестивальдә катнашырга теләк белдерүен исәпкә алып, бу юлы оештыручылар тагын бер өстәмә номинация булдырырга уйлаган. 19-20 март көннәрендә “Татар моңы”ның икенче турына йомгак ясалачак. 21 март - Нәүрүз бәйрәмендә  - өченче тур уза. Бу юлы фестивальдә катнашучылар иҗатына тамашачылар да бәя бирә алачак. Гала-концерт 6 апрельгә планлаштырылган.